¡ACABAR COLA IMPUNIDÁ FRANQUISTA YÁ!
Toles iniciatives parllamentaries que tienen que ver con estos derechos atópense paralizaes nel Congresu y Senáu, ensin qu'existan plazos fixaos pa la so tramitación efectiva. La Llei de Memoria Democrática, la Llei de Secretos Oficiales, la Llei de Bebés Robaos y la modificación del Códigu Penal pa la incorporación del Principiu de llegalidá internacional nel derechu internu lleven años arrequexaes, ensin que tampoco agora paezan existir certeces de que les vaigan tramitar y sancionar.
El Gobiernu xustifica esta paralización pola existencia d'otres prioridaes sociales. Sicasí, a la vista d'otres iniciatives llexislatives impulsaes nesti periodu, pue concluyise que la falta de voluntá política pa poner fin al modelu d'impunidá existente ye la razón principal pola que nun s'encaren de forma inmediata les modificaciones llexislatives necesaries pa garantizar definitivamente los derechos de toes aquelles persones que sufrieron violaciones graves de derechos humanos nel franquismu.
Pasaron más de 43 años de l'aprobación de la Constitución y cientos de miles de persones y los sos familiares que padecieron violaciones de derechos humanos siguen tovía aguardando verdá, xusticia y reparación: asesinatos, desapaiciones, trabayu esclavu, espoliu patrimonial, exiliu, robu de neños, tortures, cárcel, zarramientos en centros pa muyeres desafectes al réxime, represalies llaborales... Nin siquiera se dio l'anulación real de les sentencies por delitos políticos de los tribunales franquistes.
Los acuerdos y normes aprobaes hasta la fecha nesti ámbitu foron a les clares insuficientes y frustrantes. La política de memoria histórica llevada a cabu hasta agora tuvo orientada a reconocimientos institucionales mui parciales, tibios, insuficientes y a la implementación de midíes de calter alministrativu y n'ámbitu individual, omitiendo a costafecha cualquier clas d'actuación que pudiere revertir el modelu d'impunidá imperante.
Son munches víctimes directes d'estes violaciones de derechos humanos les que foron desapaeciendo añu tres d'añu, pero gracies al coraxe de los sos familiares y del movimientu social, cada vez son más les voces esixendo'l fin de la impunidá. Y ta claro que nun ye demasiao tarde: con independencia de la situación de víctimes y victimarios, la xusticia tien qu'investigar y tipificar los delitos cometíos, identificando a aquelles.
Pero pa eso ye menester activar yá, y ensin nengún retrasu más, les iniciatives memorialistes paralizaes güei nel Congresu y abrir asina les puertes al llogru de la Verdá silenciada y escondida, l'aplicación d'una Xusticia ensin escepciones y la puesta en marcha d'una política de Reparación plena pa toles víctimes del franquismu. Asina lo esiximos, y asina lo vamos siguir reclamando les organizaciones memorialistes, de derechos humanos, feministes, sindicalistes, ecoloxistes y de munchos otros ámbitos que soscribimos esti escritu.
¡ACABAR COLA IMPUNIDÁ FRANQUISTA YÁ!
¡VERDÁ, XUSTICIA Y REPARACIÓN YÁ! ¡NENGUNA PRÓRROGA MÁS!
